ခံစားလွယ်တဲ့ စိုးပြည့်သဇင်

တက်သစ်စ သရုပ်ဆောင်တွေထဲမှာ အချိန်တိုတိုလေးနဲ့ ပရိသတ် အသိအမှတ်ပြုခံရတဲ့ သရုပ်ဆောင်ထဲမှာ စိုးပြည့်သဇင်လည်း ပါပါတယ်။

နင့်နင့်သီးသီးနဲ့ ငိုရတဲ့ ဇာတ်ဝင်ခန်းတွေမှာ ပိုင်ပိုင်နိုင်နိုင် သရုပ်ဆောင်နိုင်တဲ့ စိုးပြည့်သဇင်က စိုးညီအစ်မတွေရဲ့ ညီမတစ်ယောက်ဖြစ်တဲ့အလျောက် သရုပ်ဆောင်မှုပိုင်းကို ကြိုးစားပမ်းစား လုပ်ဆောင်သူပါ။ ကျန်းမာရေးမကောင်းပေမယ့် ၀ါသနာပါတဲ့ အနုပညာအလုပ်ကို အားတက်သရော ဆောင်ရွက်နေတဲ့ စိုးပြည့်သဇင်က နှလုံးအားနည်းတဲ့ရောဂါခံစားနေရင်း ရွှေအမြုတေမဂ္ဂဇင်းအတွက် ဓာတ်ပုံရိုက်ပေးခဲ့ပါတယ်။ အ၀တ်အစားပုံစံကို လူငယ်ဆန်ပေမယ့် ခပ်ဟော့ဟော့ပုံစံတွေ မ၀တ်ရဲတဲ့ စိုးပြည့်သဇင်အတွက် အ၀တ်အစားကို Hito ကစီစဉ်ပေးထားပါတယ်။ စီစဉ်ထားတဲ့ အ၀တ်အစားအပြင် မြင်ရတဲ့ အမြင်ရိုးမသွားစေဖို့ Location ကို စဉ်းစားသလို ပါဝင်ရမယ့် ပစ္စည်း၊ ပစ္စယကိုလည်း စဉ်းစားကြပါတယ်။ ဂီတကိုလည်း ၀ါသနာပါတဲ့ စိုးပြည့်သဇင်နဲ့လိုက်ဖက်အောင် ဓာတ်ပုံဥာဏနဲ့အတူ စဉ်းစားကြရာမှာ ချယ်လို၊ စန္ဒရား များနဲ့ရိုက်ဖို့ စဉ်းစားကြပါ တယ်။

ချယ်လို၊ စန္ဒရားများ တစ်နေရာတည်းမှာရတဲ့ ဗိုလ်ချုပ်ဈေးမှာ မြတ်နိုးသူ (ဂီတတူရိယာ)ဆိုင်ဖွင့်ထားတဲ့ ဦးစန်းမောင်ရဲ့အိမ်မှာရိုက်ကူး ကြပါတယ်။ ဆိုကရေးတီး ပြိုင်ပွဲမှာ စန္ဒရားအတီးနဲ့ဆုရရှိခဲ့ဖူးတဲ့ စိုးပြည့်သဇင်က စန္ဒရားတီးရင်း အကောင်းဆုံး သရုပ်ဆောင်ပေးပါတယ်။ စန္ဒရားတီးသလို ချယ်လိုတီးရင်း သရုပ်ဆောင်ပေးတဲ့ စိုးပြည့်သဇင်ကို ဓာတ်ပုံဥာဏ ကလည်း အကောင်းဆုံးဖြစ်အောင် ရိုက်ကူးပေးပါတယ်။

နေမကောင်းပေမယ့်ရတဲ့အချိန်လေးအတွင်းမှာ အကောင်းဆုံး သရုပ်ဆောင်ပေးတဲ့ စိုးပြည့်သဇင်ကို မိတ်ကပ်လိမ်းခြယ် ပေးသူကသုန်သုန်ပါ။ သုန်သုန်ရဲ့ မိတ်ကပ်ပြင်ဆင်မှုနဲ့ လှပနေတဲ့ စိုးပြည့်သဇင်ကို ရွှေအမြုတေအတွက် မေးမြန်း ဖြစ်ပါသေးတယ်။

စိုးပြည့် တစ်ကိုယ်တော် စီးရီးရဲ့အခြေအနေ ဘယ်လိုရှိနေပြီလဲ။

“သီချင်းက ရေးနေတဲ့ အဆင့်ကနေ မတက်သေးဘူး။ ရုပ်ရှင်ကားကြီးမှာလည်း သရုပ်ဆောင်ဖြစ်နေတော့ ရုပ်ရှင်ဘက်ကို အာရုံစိုက်ဖြစ်နေတယ်။ ဖေဖေက သီချင်းရွေးပေးတယ်။ ဖေဖေက စိုးပြည့်နောက်ကို လိုက်ပေးနေရတဲ့အတွက် သီချင်းမရွေးနိုင်ဘူး ဖြစ်နေတယ်။ သီချင်းလည်း မကျင့်ဖြစ်ဘူး။ Show တွေဆိုမှပဲ သီချင်းကျင့်သလို ဖြစ်သွားတာ”

တောင်ကြီးသင်္ကြန်မှာ Iron Cross အဖွဲ့ရဲ့တီးခတ် မှုနဲ့အတူ ဖျော်ဖြေရတဲ့ အရ သာကို ပြောပြပေးပါဦး။

“show အဆိုနည်းတဲ့ စိုးပြည့်အတွက် စိုးပြည့် ဘ၀မှာ အများဆုံးဖြစ်မယ် ထင်တယ်။ တောင်ကြီးပရိသတ် က တော်တော်များတာ။ Iron Crossနဲ့လည်း ပထမဆုံး ဆိုဖူးတာလည်း ဖြစ်တယ်။ ပရိသတ် က လည်းများတော့ တော်တော်ကြောက်တယ်။ စင်ကလည်း အမြင့်ဆိုတော့ ပိုကြောက်တယ်။ ဒါပေမယ့် ပရိသတ်က ယဉ်ယဉ်ကျေးကျေးနဲ့ အားပေးတဲ့အတွက် ကျေနပ်ခဲ့ရတယ်။ Iron Cross က ဦးချစ်စမ်းမောင်နဲ့ ဖေဖေတို့က သိတော့ ဆိုရတာတော့ မကြောက်တော့ဘူး။ ဒါပေမယ့် သီချင်းစာပိုဒ်မှားမှာတော့ ကြောက်ခဲ့ရတယ်။ Iron Cross နဲ့ မဆိုရခင်က Iron Cross နဲ့ ဆိုရဖို့ မျှော် လည်းမျှော်လင့်ခဲ့တယ်။ ပြောရရင် သင်္ကြန်ပွဲမှာ သီချင်းဆိုတာ သီချင်းမတိုက်ဘဲနဲ့ ဆိုခဲ့ရတာ အမှတ်တရပဲ။ နာမည်ကြီးတီးဝိုင်းဖြစ်တော့ သီချင်းမတိုက်ပေမယ့် စိုးပြည့်ရဲ့ အားနည်းမှုကို ဖြည့် ပေးပါတယ်”

Show တချို့ဆိုတဲ့အခါ စက်မှုပိုင်း မကောင်းတာနဲ့ ကြုံဖူးလား။

“တီးဝိုင်းရဲ့ ပံ့ပိုးမှုက များစွာလိုအပ်သလို မိုက်ကရို ဖုန်းကောင်းမွန်မှုလည်း လိုအပ်ပါတယ်။ တချို့နယ် တွေသွားတဲ့အခါ မကောင်းတဲ့ စက်တွေနဲ့ ကြုံဖူးတယ်။ သူတို့ကလည်း တတ်နိုင် သလောက်လုပ်ပေးထားကြတာ။ အဲဒီတော့ စိုးပြည့်တို့ရဲ့ အသံတွေက အဆင်မပြေဘူး။ အဲဒါမျိုးဆို အရမ်းကြောက်တယ်။ ပရိ Showကစက်တွေ မကောင်းတာ မသိတော့ အသံကဘယ်လိုကြီး လဲမသိဘူးဆိုပြီး ဖြစ်သွားရော။ အခုဆိုခဲ့တဲ့ Iron Cross နဲ့ပွဲမှာ စက်တွေက ဦးချစ်စမ်းမောင်ရဲ့ စက်တွေ၊ အရမ်းကောင်းတဲ့ စက်တွေဆိုတော့ စိုးရိမ်ရမှု မရှိတော့ပါဘူး။ Rock တီးတာ အရမ်းပိုင်တဲ့ ၀ိုင်းလေ”

ရန်ကုန်မှာသာ Iron Cross နဲ့ ဆိုရမယ်ဆိုရင် စိုးပြည့်ရဲ့ သီချင်းသစ်တွေနဲ့ ဖျော်ဖြေဖို့ စဉ်းစားမလား။

စိုးပြည့်ရဲ့တစ်ကိုယ် တော်ထဲမှာ Show Rock, Pop အပြင်းစားလေးတွေထည့်ထားတယ်။ Show ဆိုရင်လည်း လိုက်မယ့်သီချင်းလေးတွေ ထည့်ထားတာဆို Iron cross နဲ့ဆိုရမယ်ဆိုရင် အဲဒီ သီချင်းတွေ ဆိုဖြစ်မှာ ပါ။

တစ်ကိုယ်တော်ကို ဘယ်တီးဝိုင်းနဲ့တီးမှာလဲ။

Iron Cross နဲ့တီးမယ် လို့ စိုးပြည့် စိတ်ကူးထားတယ်။ ကိုဇ၀ါ၊ ကိုဆောင်းဦးလှိုင်၊ R ခိုင်၊ ရယ်ဂျီ၊ ဦး မြင့်မိုးအောင်၊ ဦးမင်းချစ်သူ တို့ကို ရေးပေးဖို့ စိုးပြည့် တောင်းဆိုမယ် ။

အဲဒီတေးရေးတွေကို ဘာကြောင့်ရေးစေချင်တာလဲ။

“တေးရေး တစ်ယောက်ချင်းစီက တစ်မျိုးစီ တော်ကြတယ်လေ။ စိုးပြည့်ရဲ့ အခွေထဲမှာ သီချင်းအစုံ၊ တေးရေးဆရာအစုံ ပါချင်တယ်။ ဦးမင်းချစ်သူနဲ့ ရင်းနှီးသလို ကိုဇ၀ါနဲ့ကလည်း ဆွေမျိုး မကင်းဘူးလေ။ သူတို့ရေးတာတွေ ကြိုက်တော့ စုံသွားတာပါ။ ဦးမင်းချစ်သူဆိုရင် ရေးတဲ့စာသားက တစ်လုံးချင်းစီ အဓိပ္ပာယ်ကောင်းတယ်။ ဦးဖိုးကာရဲ့ တစိမ့်စိမ့်ကြည့် သီချင်းဆိုရင် အရမ်း ကွန့်ထားတာ မဟုတ်ဘဲ နားထဲကိုတန်းဝင်တယ်။ စာသားတွေကအစလေ၊ စိုးပြည့်က အဲဒါမျိုးတွေဆို ကြိုက်တယ် ”

တစ်ကိုယ်တော် အတွက် သီချင်းရွေးချယ်မှု ပိုင်းက စိုးပြည့်အတွက် ခက်ခဲမှု ရှိနိုင်မလား။

“သီချင်းရှာရတာ ခက်ပါတယ်။ ထူးထူးခြားခြားလည်း ဖြစ်ချင်တာကိုး။ သီချင်းတိုင်းက ကိုယ်နဲ့လိုက်လား၊ မလိုက်လား မပြောနိုင်ဘူး။ ကိုယ့်အသံနဲ့ လိုက်မယ့် သီချင်းမျိုးကို ရှာရတာ။ စိုးပြည့်က ကိုယ်ပိုင် ရယ်၊ ကော်ပီရယ် မရွေးဘူး။ အသံနဲ့လိုက်မယ့်ဟာကိုပဲ အဓိက ရွေးနေတယ်။ စိုးပြည့် အသံလုံးကကြီးတော့ သီချင်း တော်တော် ရွေးရတယ်။

စိုးပြည့်စပြီးရိုက်ဖြစ် တဲ့ဇာတ်ကားတွေက ဒရာမာ တွေများပေမယ့် အခုနောက်ပိုင်း ဖဲန်စီကားတချို့လည်း ရိုက်ဖြစ်တယ်။ ဘာကြောင့် လဲ။

အဲဒီ ဒရာမာဆိုတာကို သမီးပြောချင်တယ်။ လူတွေ က ငိုရင် ဒရာမာလို့ သတ်မှတ်ကြတယ်။ ငိုရင် ဒရာမာ မဟုတ်ဘူး။ ဒရာမာဆိုတာက မိသားစု၊ အုံလိုက်ကျင်းလိုက်၊ အရင်တုန်းက စိုးပြည့် နဲ့ ကိုမြင့်မြတ်တို့နဲ့ ရိုက်ခဲ့တဲ့ ကားတွေပေါ့။ မာနမင်းသား ဇာတ်ကားဆိုရင် အချစ်ဇာတ် ကားလေး၊ ချစ်ခြင်းမေတ္တာကို ဖွဲ့ထားတဲ့ ဇာတ်ကားဖြစ် တယ်။ ပရိသတ်တွေက အချစ်ကားလည်း ကြိုက်ကြတယ်။ အချစ်အကြောင်းလည်း စိတ်ဝင်စားကြတော့ အချစ်ကားတွေ အရိုက်များတယ်။ ဟာသကားလည်း ရိုက်ဖြစ်တယ်။ အချစ်လား-လာထား ဇာတ်ကားမှာဆိုရင် မျက်မှန်နဲ့ အူကြောင်ကြောင် ကောင်မလေး၊ ရယ်စရာ လုပ်ရတာ”

စိုးပြည့်အနေနဲ့ ရုပ်ရှင်ကားကြီး စရိုက်တဲ့အချိန်မှာ ဟာသကားနဲ့ပဲ စခဲ့တယ်။အခု နောက်ပိုင်း စိုးပြည့်ရိုက် ဖြစ်တဲ့ ရုပ်ရှင်တွေကလည်း ဟာသတွေ ဖြစ်နေတယ်။ဘယ်လိုပုံစံနဲ့ လက်ခံရိုက်ဖြစ် လဲ။

“အခု ကားကြီး တော်တော်များများက ဟာသတွေချည်းပဲ၊ ဟာသကို ပရိသတ်ကလည်းကြိုက်တယ်။ စိုးပြည့်တို့အရွယ်တွေနဲ့ဆိုရင် ဟာသပဲရိုက်ကြတယ်။ ဟာသက မြတ်လည်းမြတ်တာကိုး။ စိုးပြည့်ဆိုရင် ဦးညီညီ ထွန်းလွင်နဲ့ပဲ ရိုက်ဖြစ်တယ်။ ဒါရိုက်တာပေါ်မူတည်ပြီး ရိုက်တာမဟုတ်ပါဘူး။ ကားကြီးလာငှားရင် ရိုက်တာပဲ။ ကားကြီးက ရိုက်ရဖို့နည်း နည်းခဲယဉ်းတယ်လေ။ ဟာ သရယ်၊ဒရာမာရယ်လို့ မခွဲဘဲ ကားကြီးဆိုရင် ရိုက်ပါတယ်။ ပါတဲ့သရုပ်ဆောင်များရင် လက်မခံဘူးဆိုတာလည်း မရှိပါဘူး။ ကားကြီးက သရုပ်ဆောင်နည်းဖို့က ခဲယဉ်းတာပဲ။ အုံလိုက်ကျင်းလိုက်နဲ့ အနုပညာမောင်နှမတွေလုပ်ကြတာဆိုတော့ သရုပ်ဆောင်များလို့ မရိုက်ဘူးဆိုတာ မရှိပါဘူး။ စိုးပြည့်တို့ရဲ့ လုပ်ဆောင်ကွက်ကိုလည်း မျှပြီးပေးပါတယ်။ ၀ါရင့်တွေနဲ့အတူတူ ယူလို့တော့မရဘူးလေ။ စိုးပြည့်တို့က အခုမှ စလုပ်တာ။ ဘာမှမလုပ်တတ်သေးတဲ့ သူတွေဆိုတော့ ဟာသကို ကိုယ်လုပ်နိုင်သလောက်ပဲ လုပ်ရတယ်”

ဒါရိုက်တာ ချိုတူးဇော် ရိုက်တဲ့ ဇမ္ဗူဒီပါလက်ျာတောင်ကျွန်းက လွမ်းတတ်တဲ့သူ ဇာတ်ကားမှာ ကောင်လေးကို လိုက်ကြိုက်တဲ့ သွက်သွက်လက်လက်ကောင်မလေးအဖြစ် သရုပ်ဆောင်ထားတော့ အပြင်မှာရော စိုးပြည့်သူငယ်ချင်းတွေနဲ့ ဆုံတဲ့အခါ အဲဒီလိုမျိုး စနောက်ဖြစ်လား။

မေးမှမေးရက်တယ် အစ်မရယ်။ အဲဒီကားကို စိုးပြည့် ရိုက်ရတာ တော်တော်အူယားတယ်။ အချစ် လား...လာထား ကားမှာလည်း မိုးအောင်ရင်ကို တစ်ဖက်သတ် ကြိုက်ရတာပဲ၊ အဲဒီလိုသရုပ်ဆောင်ရတာ စိတ်ထဲမှာ ကိုးလိုးကန့်လန့် နိုင်တယ်”

မိန်းကလေး သူငယ်ချင်း ငါးယောက်ခြောက်ယောက်လောက်စုမိတဲ့အချိန် ကောင်လေးချောချောသန့်သန့် လေးတစ်ယောက်လောက် တွေ့ရင် လိုက်စတာမျိုးရှိခဲ့ဖူးလား။

စိုးပြည့် အဲဒီလိုမျိုး ဘယ်တော့မှ မရှိခဲ့ဘူး။ အဲဒီလိုမျိုးလည်း မကြိုက်ဘူး။ မြန်မာမိန်းကလေးတစ်ယောက်က ဣနြေ္ဒသိက္ခာရှိရမယ်လေ။ ဇာတ်လမ်းတွေထဲမှာတော့ ချစ်စရာကောင်းအောင် သရုပ်ဆောင်ထားတာပါ။ သရုပ်ဆောင်ရင်းနဲ့တော့ တော်တော်အူယားပါတယ်။

အဲဒီလို အူယားတာက စိုးပြည့်အနေနဲ့ သရုပ်မဆောင် နိုင်လို့လား။

“စိုးပြည့် အူယားတယ် ဆိုတာက အဲဒီပုံစံမျိုးဘယ်တုန်းကမှ မရှိခဲ့ဘူး။ ကျောင်းတက်တုန်းကလည်း ယောက်ျားလေး သူငယ်ချင်း တစ်ယောက်မှလည်း မထားခဲ့ဘူး။ စိုးပြည့်မှာ အပေါင်းအသင်းလည်း သိပ်မရှိဘူး။ မိန်းကလေး သူငယ်ချင်းမှ နှစ်ယောက်လောက်ပဲ ရှိတယ်။ မိန်းကလေး သူငယ်ချင်းတောင် နှစ်ယောက်လောက်ပဲရှိတာ ယောက်ျားလေး သူငယ်ချင်းဆိုရင် ဝေးရော။ ယောက်ျားလေးတွေနဲ့ ရောရောနှောနှော မနေတတ်ဘူး”

အပြင်မှာ ဒီလိုနေကျင့် မရှိတော့ သရုပ်ဆောင်ရမယ် ဆိုရင် သရုပ်မဆောင်ချင်တာမျိုးရှိလား။

“သရုပ်ဆောင်ဆိုတာ ဆေးစက်ကျရာ သရုပ်ဆောင် နိုင်ရမှာပဲလေ။ သရုပ်မဆောင်ချင်ဘူးရယ်လို့ မရှိပါဘူး။ အဲဒီထက်ဆိုးတဲ့ Character တွေ အများကြီး ရှိသေးတယ်လေ။ လုံးဝပျက်စီးနေတဲ့ မိန်းကလေးပုံစံ ရှိသေးတယ်။ ကိုယ် မနှစ်သက်လို့ ၊ ကိုယ်မကြိုက်လို့ သရုပ်မဆောင်တာမျိုး မရှိဘူး။ သရုပ်ဆောင်ရင် ကိုယ်မဟုတ်တော့ဘူးလို့ သတ်မှတ်ပြီး လုပ်တယ်”

မိန်းကလေးတစ် ယောက်အနေနဲ့ ဘယ်လို စည်းဘောင် တွေရှိရမယ်လို့ စိုးပြည့်ကိုယ်စိုးပြည့် ချမှတ်ထားလဲ။

စိုးပြည့် ငယ်ငယ်လေး ကတည်းက မိန်းကလေးသိက္ခာကို မြတ်နိုးတယ်။ တန်ဖိုးထားတယ်။ ဘယ်အရာနဲ့မှမလဲနိုင်ဘူး။ ကျောင်းမှာလည်း စံပြဖြစ်အောင်နေခဲ့တယ်။ သတိလည်းထားတယ်။ ကျောင်း မှာလည်း ဆရာမတွေက ရည်းစားထားတာတွေ ဘာတွေ မကြိုက်ဘူး။ စိုးပြည့်က ရည်းစားလည်း မထားဘူး။ ယောက်ျားလေးတွေနဲ့ ဝေး ဝေးနေတဲ့အခါကျတော့ ငယ်ငယ်လေးကတည်းက အကျင့်တွေ အခုထိပါလာတယ်။ ဒီဂုဏ်လေးကို မပျက်အောင် အမြဲထိန်းထားမယ်။

သရုပ်ဆောင်လောက ထဲဝင်တော့ အဲဒီလိုမျိုးနေလို့ အဆင်ပြေရဲ့လား။

စိုးပြည့် ငယ်ငယ်လေး ကတည်းက နေလာခဲ့တဲ့ အကျင့်ဆိုတော့ အနုပညာမောင်နှမအားလုံးလည်း ဖြစ်တဲ့အတွက် မောင်နှမလို စည်းစည်းလုံးလုံးလုပ်တယ်။
ထွေထွေထူးထူး ထိန်းသိမ်း စရာမလိုဘူး။ စိုးပြည့်က အပြင်အပေါင်းအသင်းလည်း မရှိတော့ အဆင်ပြေပါတယ်။

နည်းပညာတိုးတက် မှုကို အသုံးချပြီး တစ်ဖက် လူရဲ့ ဂုဏ်သိက္ခာ ထိခိုက် အောင် ပြုလုပ်ခြင်းအပေါ် စိုးပြည့်တို့လို မိန်းကလေး အနေနဲ့ ဘာများပြောချင်လဲ။

“ကိုယ့်ဘက်က သတိထားရမှာပေါ့။ လုပ်ကြံတယ် ဆိုရင် လုပ်ကြံတဲ့သူရဲ့ အပြစ်ပေါ့။ ကိုယ့်ဘက်ကတော့ မဖြစ်အောင် သတိထားရင် အကောင်းဆုံးပေါ့။ နည်းပညာတိုးတက်မှုကို ကောင်းတဲ့နေရာမှာ အသုံးချရင် အကျိုးရှိပေမယ့် မကောင်းတဲ့ နေရာမှာ အသုံးချရင်တော့ ဆိုးကျိုးရှိနိုင်တယ်”

စိုးပြည့် သရုပ်ဆောင် တဲ့အခါ အကောင်းဆုံး စိတ်နှစ်ပြီး သရုပ်ဆောင်တယ်။ တခြားသရုပ်ဆောင်တွေရဲ့ ဇာတ်ကားတွေ ကြည့်ရင် စိတ်နှစ်ခံစားပြီး ကြည့်ဖြစ် လား။

“တခြားသရုပ်ဆောင် တွေရဲ့ ဇာတ်ကားကို ကြည့်တဲ့အခါ သူတို့ငိုရင် လိုက်ငိုတယ် သူတို့ရယ်ရင် လိုက်ရယ်တယ်။ တကယ်ကို ခံစားပြီး ကြည့်တယ်။ ဒါရိုက်တာတွေနဲ့ ပြန်တွေ့ရင် သူတို့ နှစ်ယောက်ကို ဘာလို့ ပေးမညားတာလဲတို့ ဘာတို့ ပြောတယ်။ ၀တ္ထုဖတ်ရင်လည်း ကောင်လေးနဲ့ ကောင်မလေး ပြဿနာဖြစ် ကွဲသွားတယ်။ သေသွားတယ်ဆိုရင် အဲဒီ ၀တ္ထုကို လှည့်မကြည့်တော့ ဘူး။

ခံစားတတ်လွယ် တယ်။ အသည်းနုတာပေါ့။

“မပြောတတ်ဘူး။ စိုးပြည့်ရှေ့မှာ ၀မ်းနည်းစရာ လာလုပ်လို့မရဘူး။ ၀မ်းနည်းလွယ်တယ်။ အမေအို တစ်ယောက်ဘေးမှာလာထိုင်ရင် ကိုယ့်အဘွားကိုယ်သတိရပြီး ငိုပြန်ရော”

ကိုယ့်ဇာတ်ကားတွေ ကိုယ်ပြန်ကြည့်ရင်ရော။

“ကိုယ့်ကားကို ပြန်ကြည့်ရင် ဘာခံစားချက်မှမရှိတော့ဘူး။ အမေတို့ အဖေတို့ အကုန်လုံးက အပြစ်ရှာပြီးပဲ ကြည့်ကြတာလေ။ ကိုယ့်ဘက်ကလိုနေတာတွေ သိနေတာဆိုတော့ ခံစားချက်တွေ ပျောက်ကုန်ရော။ ကားတစ် ကားထွက်ရင် ကိုယ်ဘာလို တယ်ဆိုတာသိမှပဲ အကောင်း ဆုံးဖြစ်မှာ။ နောက်တစ်ခေါက် ပြန်ကြည့်လည်း ကြိုက်လို့ မဟုတ်ဘူး။ အပြစ်ရှာဖို့ပဲ ပြန် ကြည့်တယ်”

ခံစားလွယ်လို့ သရုပ်ဆောင်တစ်ယောက်ဖြစ်လာတယ်လို့ ပြောရမှာပေါ့။

“အဲဒါလည်းပါတယ်။ အနုပညာရှင်တော်တော်များများက စိတ်နုကြတယ်။ ဘယ်လိုပြောမလဲ အနုပညာ လုပ်တဲ့သူ တော်တော်များများ အသည်းနုတတ်ကြတယ်။ သိပ်မခံစားနိုင်ကြဘူး။ အသည်းမာတဲ့သူတွေလည်း ရှိပါတယ်။ တော်တော်များများကတော့ အသည်းနုကြတယ်။ စိုးပြည့်က ငယ်ငယ်လေးကတည်းက မျက်ရည်လွယ်တယ်။ ကားရိုက်ရင်လည်း စိတ်နှစ်လိုက်ရင် တကယ် ဖြစ်နေတဲ့အတိုင်း ဖြစ်သွားတယ်။ တစ်ခါတလေ ရာသီဥတုကြောင့်ပဲဖြစ်ဖြစ် ငိုတဲ့အခန်းအတွက် mood သွင်းလို့ မရတာတွေ ရှိတတ်ပါတယ်”

ဒါရိုက်တာညိုမင်းလွင်ရိုက်တဲ့ ပန်းပွင့်တွေရဲ့နေ့၊ ဓားသွားတွေရဲ့ည ရိုက်ကွင်းမှာ အမှတ်တရ ရှိခဲ့တယ်။ စိုးပြည့်ရဲ့ ဒုတိယမြောက်ဇာတ်ကားလည်းဖြစ်တယ်။ အဲဒီကားမှာ တောင်ပေါ်ကပြုတ်ကျပြီး သေတဲ့ဇာတ်ဝင်ခန်း ရိုက်ရာမှာ ဖင်ထိုင်လျက်မကျဘဲ ခေါင်းနဲ့ကျသွားတယ်။ တောင်အောက်မှာ မွေ့ရာတွေချထားတယ်။ နွယ်ကြိုးကို ကိုင်ပြီးဖင်နဲ့ကျရမှာ မကျဘဲ ခေါင်းနဲ့ထိုးကျသွားတာ။ ကံ ကောင်းလို့ တစ်ပတ်လည်ပြီး ကျသွားတာ။ အဲဒါအမှတ်တရအဖြစ်အပျက်။ ဧဒင်ရဲ့ ကျေးကျွန်များ ရိုက်တုန်းကလည်း အဲဒီလိုပဲ၊ ဖြေသိမ့်လိုက် သီချင်းနောက်ဆုံးပိုဒ် အမြူးလေးနဲ့သိမ်းတာ။ သူ ငယ်ချင်းလေးယောက်လက် တွဲပြီးပြေးတဲ့ ဆင်းန်မှာ စိုးပြည့်က ဒေါက်အမြင့် စီးထားတယ်။ ပြေးရမယ့်နေရာကလည်း ရေတွေလွှမ်းနေတာ။ ချိုင့်တွေ၊ ဘာတွေ မမြင်ရဘူး။ အရှိန်နဲ့ပြေးတော့ ချိုင့်ထဲကျပြီး လဲမကျန်ခဲ့ဘဲ ဒရွတ်တိုက်ပါသွားတာ၊ ဒူးတွေပြဲ၊ စကတ်တွေလည်းပြဲ အမှတ်တရတွေက အနာတရတွေချည်းပဲ” လို့ စိုးပြည့်သဇင်က ရိုက်ကူးရေးတစ်လျှောက်မှာ အမှတ်တရရှိခဲ့တဲ့ အမှတ်တရ အဖြစ်အပျက်များကို ပြောပြပါသေးတယ်။




ခင်လေးမြင့်