ရေထွက်ပစ္စည်း တရုတ်တင်ပို့မှု မအောင်မြင်

ယမန်နှစ်က ပြန်လည်ဖွင့်လှစ်ခဲ့သည့် ကချင်ပြည်နယ်၊ ဆဒုံးမြို့နယ်၊ ကန်ပိုက်တီးနယ်စပ် ကုန်သွယ်ရေး (နကသ) စခန်းမှတဆင့် မြန်မာ့ရေထွက်ပစ္စည်းများ တရုတ်ပြည်သို့ တင်ပို့မှု မအောင်မြင်ကြောင်း သိရသည်။

ယခုအခါ မူလလမ်းကြောင်းဖြစ်သည့် မန္တလေး-မူဆယ်လမ်းကြောင်းကို ပြန်လည်အသုံးပြုနေရသည်။

တရုတ်-မြန်မာနယ်စပ် မူဆယ် (၁ဝ၅) မိုင် နယ်စပ်ကုန်သွယ်ရေးဇုန်တွင် တရုတ်ကုန်သည်များက ဈေးကွက်ချယ်လှယ်ကာ ဈေးပြိုင်စနစ်ဖြင့် ဈေးညှိပေးနေ၍လည်းကောင်း၊ အသစ်ဖွင့်လှစ်လိုက်သည့် ကန်ပိုက်တီး နကသ စခန်းကို လုပ်ငန်းလည်ပတ်မှု ရှိစေချင်၍လည်းကောင်း ရေထွက်ပစ္စည်းများဖြစ်သည့် ရေခဲရိုက် ငါး၊ ကဏန်း၊ ငါးရှဥ့်နှင့် ပုစွန် စသည့် ရေထွက်ကုန်များကို စမ်းသပ်တင်ပို့ခဲ့သော်လည်း မအောင်မြင်သည့်အတွက် မူလလမ်းကြောင်းကို ပြန်သုံးရခြင်းဖြစ်သည်ဟု နကသ ဝန်ထမ်းများနှင့် နီးစပ်သူက ပြောသည်။

၎င်းက “တရုတ်တွေက အုပ်စုနှစ်ခုခွဲပြီး အချင်းချင်းဈေးညှိပြီး ပေးနေတော့ ရေထွက်ကုန်အပေါ် သူတို့က ချုပ်ထားသလို ဖြစ်နေတာလည်း ပါတယ်။ နောက်တခုက ကန်ပိုက်တီးကနေပို့ရင် အဆင်ပြေမလားဆိုပြီး စမ်းသပ်တဲ့အနေနဲ့ လုပ်တာလည်း ဖြစ်နိုင်တယ်။ မအောင်မြင်တော့ ဒီဘက်မှာ ပြန်လုပ်ခဲ့ရတာ” ဟု ပြောသည်။

၂ဝဝ၉-၂ဝ၁ဝ ဘဏ္ဍာရေးနှစ်အတွက် ရေထွက်ပစ္စည်းတင်ပို့မှုမှ အမေရိကန်ဒေါ်လာ သန်း (၇ဝဝ) ရရှိရန် မျှော်မှန်း လျာထားသော်လည်း လျာထားချက်၏ (၇ဝ.၉၁) ရာခိုင်နှုန်းသာ လုပ်ဆောင်နိုင်ခဲ့ကြောင်း မြန်မာစစ်အစိုးရ၏ တရားဝင် စာရင်းကိန်းဂဏန်းများကို ကိုးကားပြီး တရုတ်အစိုးရပိုင် ဆင်ဟွာသတင်းက ဖော်ပြထားသည်။

ထိုသုိ့ ရေထွက်ထုတ်ကုန် ပြည်ပတင်ပို့မှုမှ လျာထားချက် မပြည့်မီသည့်အပေါ် ပို့ကုန်လုပ်ငန်းရှင်များကို အာဏာပိုင်များက အပြစ်တင်ခဲ့ပြီး၊ နောင်အခါ အလားတူ အဖြစ်မျိုး ဖြစ်ပါက အပြစ်ပေး အရေးယူသွားမည်ဟု အာဏာပိုင်များက မေ (၁ဝ) ရက်နေ့တွင် သတိပေးထားကြောင်း သတင်းတွင် ဖော်ပြသည်။

ရေထွက်ပို့ကုန် လုပ်ငန်းရှင်တဦးကမူ ရေထွက်ပစ္စည်းများ ကန်ပိုက်တီးလမ်းကတဆင့် တင်ပို့ရန် စီစဉ်ခဲ့မှုကြောင့် မှောင်ခိုတင်ပို့မှုဘက်သို့ ဦးတည်သွားစေခဲ့ပြီး နိုင်ငံတော်အတွက် အကျိုးမရှိသကဲ့သို့ ကုန်သည်များလည်း ပိုပြီး နစ်နာစေကြောင်း ပြောသည်။

၎င်းက “မန္တလေးကနေ မြစ်ကြီးနားအထိ တက်၊ အဲဒီကနေ ကန်ပိုက်တီးသွားဆိုတော့ လမ်းခရီးကြမ်းတာကော၊ အချိန်ကြာတာရော ကဏန်းတွေ ပိုသေကြတယ်၊ အရှုံးဆုံး ပိုကြီးတယ်။ အဲဒီတော့ ဗန်းမော်ကတဆင့် လိုင်ဇာလမ်း ဒါမှမဟုတ် လွယ်ဂျယ်လမ်း၊ နမ်းခမ်း-မံဝိန်းလမ်းဘက် ရောက်သွားတယ်။ အခုချိန်အထိ အဲဒီကနေ ငါးရှဥ့်တွေ၊ ကဏန်းတွေ ပို့နေကြတုန်းပဲ။ ချင်းရွှေဟော်ဘက်ကလည်း သွားနေကြတယ်။ ဆိုတော့ နိုင်ငံတော်လည်း အခွန်မရဘူး။ ကုန်သည်ကလည်း လမ်းမှာ ဟိုကြေး၊ ဒီကြေးနဲ့ ပေးရဆိုတော့ အကျိုးမရှိဘူး” ဟု ပြောသည်။

ရေထွက်ပစ္စည်းသည် မြန်မာ့ ပြည်ပပို့ကုန် တင်ပို့မှုပမာဏတန်ဖိုး စာရင်းတွင် စတုတ္ထအဆင့်နေရာတွင် ရှိသည်။ ရေထွက်ပစ္စည်းကို တရုတ်နိုင်ငံသို့ နယ်စပ်ကုန်သွယ်ရေး လမ်းကြောင်းမှတဆင့် အဓိက အများဆုံး တင်ပို့နေပြီး ထိုင်း၊ ဂျပန်၊ စင်ကာပူ စသည့်နိုင်ငံတို့ကိုလည်း တင်ပို့နေသည်။