မြောက်ကိုရီးယားလုပ်ရပ် တုံ့ပြန်ဖို့ ၀န်ကြီးကလင်တန်ဆွေးနွေး

တောင်ကိုရီးယားသင်္ဘော နစ်အောင် လုပ်ခဲ့တဲ့အပေါ် မြောက်ကိုရီယားကို အမေရိကန် နိုင်ငံခြားရေးဝန်ကြီး Hillary Clinton က ရှုတ်ချ လိုက်ပြီး ဒီအကျိုးဆက်ကို မြောက်ကိုရီးယားအနေနဲ့  ရင်ဆိုင်ရမယ်လို့  ပြောပါတယ်။

အရှေ့အာရှ ၃ နိုင်ငံခရီးစဉ် အစအဖြစ် ဂျပန်နိုင်ငံမှာ ဂျပန်နိုင်ငံခြားရေးဝန်ကြီး Katsuya Okada နဲ့ ပူးတွဲပြုလုပ်တဲ့ သတင်းစာရှင်းလင်းပွဲမှာ ခုလို ပြောလိုက်တာ ဖြစ်ပါတယ်။

တောင်ကိုရီးယား စစ်သင်္ဘော Cheonam ကို နစ်အောင်လုပ်တဲ့ လုပ်ရပ်ဟာ ရန်လိုတဲ့ လုပ်ရပ်ဖြစ်ပြီး ဒီကိစ္စနဲ့ ပါတ်သက်လို့  အမေရိကန်က ဂျပန်၊ တရုတ်၊ တောင်ကိုရီးယားတို့နဲ့ ညှိနှိုင်း ဆွေးနွေးနေတယ်လို့  Mrs. Clinton ကပြောပါတယ်။

ဒီသတင်းစာရှင်းလင်းပွဲမှာပဲ နှစ်ပေါင်း ၅၀ ရှိလာပြီဖြစ်တဲ့ ဂျပန်နဲ့ အမေရိကန်အစိုးရကြား မဟာမိတ်ဆက်ဆံရေးကို ၀န်ကြီးကလင်တန်က ဂုဏ်ပြု ပြောကြားသွားပါတယ်။ အနာဂတ်စိန်ခေါ်မှုတွေကို ရင်ဆိုင်ဖို့ လိုအပ်တဲ့ဆက်ဆံရေးအဖြစ် သူက ဖော်ပြပြောဆိုပါတယ်။

သူဟာ ဒီကနေ့ မှာပဲ ဂျပန်ဝန်ကြီးချုပ် Yukio Hatoyama နဲ့လည်း တွေ့ဆုံမှာပါ။ အိုကီနာဝါကျွန်းမှာရှိတဲ့ အမေရိကန် Marine အခြေစိုက် စခန်းကို နေရာ ရွှေ့ပြောင်းမဲ့ ဝန်ကြီးချုပ် Hatoyama ရဲ့ အစီအစဉ်နဲ့ပါတ်သက်ပြီး ဆွေးနွေးကြမှာဖြစ်ပါတယ်။
VOA Fri 21 May 2010